Виче эҥер кугу чодыра, кумда пасу, изи ялла воктеч йоген эрта. Шукерте огыл тудын моторлыкшым ужаш пиал шыргыжале. 23-28 июльышто эртаралтше сплавыш йолташем-влак дене пырля ушненна. Виче эҥер дене ийын волымаште Параньга, Шернур да Оршанке районла гыч ӱдыр-рвезешамыч лийынна. Мемнан командыште – лу йоча да кок вуйлатыше.
Корнына Виче кундем «Петропавловск» каныме базе гыч Руш Тӱрек села марте шуйнен. Чылаже – 138 километр. Кажне кечын тӱрлӧ вере шогалынна. Левжа посёлкысо краеведений тоштерыште лийынна, Чваниха ер серыште каненна.
Пуэн овартыме пушын вӱд ӱмбалне лӱҥгалтмыже ончыч кажныжым лӱдыктен. Пушкольмо дене удырашат нелын чучын. Ик километр утларак эртымеке, шкем ӱшанлын кучаш тунем шуынна. Умбакыже ласкан, йырваш ончен ийынна. Канде кавадӱр, ужар эҥер сер, вӱд йоргыктымо йӱк – чылажат ласкалыкым пӧлеклен, чонышто куатле шижмашым ылыжтен. Пуйто пӱртӱс мемнам шке помышыштыжо рӱпшен.
София ЕРЕМЕЕВА.
Параньга, Кугу Пумарий.
Фотом еш архив гыч налме
