Туштым туштем. Кишкыла коеш, шудо коклаште нушкеш. Почшо кӱрлеш — весе кушкеш. Палышда? Чын, шыҥшале. Тудым пӱртӱс лоҥгаште ужаш тунемынна гын, теве Татарстан Республикысе Актаныш район Йӱштӧ Памаш ялыште илыше Суарметовмыт мӧҥгыштӧ ашнат. Марианна ӱдырышт (снимкыште) Лаким налыктен.
— Мый янлык-влакым моткоч йӧратем. Поснак пырысым. Но пырыс кажне гаяк еҥын уло, манаш лиеш. Садлан ойыртемалтше ныл йолан йолташым налмем шуын. Тыге ӱмаште 7 апрельыште шыҥшальым мӧҥгӧ конденна. Тудо 3 апрельыште шочын. Тений ик ийым темен. Лаки лӱмым пуэнам, — ойла Марианна.
Мӧҥтыштӧ ончаш йӧршӧ тӱрлӧ урлык шыҥшале уло: фельзума, синеязыкий сцинк, бородатый агама, геккон токи да молат. Суарметовмытын чоныштым тамган-тамган леопардовый эублефар савырен. Тудо коваште тӱсшӧ дене, чынжымак, леопардым ушештара.
— Шыҥшальым ончаш йӧсыжак огыл. Нуно террариумышто (янда ате) илат. Тушто иктаж 26 градус шокшо лийшаш. Янда атым кок тылзылан ик гана эрыктыман. Шкенжым мушкаш ок кӱл, Лакин шке «ванныже» уло — тиде ночко камер. Камерым ямдым ужалат. Тиде контейнер, кӧргыштыжӧ — ночко лапчык гай але регенче. Тушто юж вӱдыжгӧ. Кочкашыже шудышырчыкым налына, коклан тудым кальциеш пӧрдыктена. Кечеш 2-3 гана сийлена, — ойла ӱдыр.
Эублефар мо дене ойыртемалтеш? Тудым кучаш лӱдмашан огыл. Коваштыже кукшо, пушкыдо, поснак шӱйжӧ дене. Йылмыже пырысын гай, тудын семынак вӱдым йӱэш. Койышыжо шотыштат пырыс дене икгайлык уло. Шинчажым почын да кумен мошта, эсогыл шинчам пӱялеш. Почшо кӱжгӧ, тушан коям шапашла. Эублефар-шамыч эрдене да кастене утларак чолга улыт.
— Кажне янлык шке семынже оҥай да мотор. Эше кишкым налаш шонем, — палдарыш Марианна.
Христина АЛЕКСАНДРОВА.
Фотом еш архив гыч налме.
