Волжский район Сотнур села гыч Никас ден Илья Игнашевмытын лӱмышт «Воштылаш, товатат, сулык огыл» фестиваль-конкурс деч вара кумдан шарлыш. «Вконтакте» соцкылыште нунын мурен куштымашышт дене ятыр видеом ончышым. Марий койышан, марий семлан шӱман еш дене палыме лийде шым чыте.
Андрей Александрович ден Наталья Викторовна кум икшывым ончен куштат. Эн кугу эргышт – Никас. Тудо Сотнур школын 5-ше классыштыже тунемеш. Школ гыч мӧҥгӧ толешат, кидше гыч гармонь огеш ойырло. Шокташ шке тунемын. Ик кнопкым темдалын, кокымшым, кумшым – сем лектын. Вара И.С.Ключников-Палантай лӱмеш колледжын выпускницыже, кызыт Нижний Новгород олаште умбакыже шинчымашым погышо Т.Е.Васильева рвезын мастарлыкшым вияҥден. Никас йочасадыш коштмыж годымак «Песенка года» республикысе конкурсышто «Йӱржӧ йӱреш» муро дене икымше верым налын. Илья шольыж дене пырля «Воштылаш, товатат, сулык огыл» фестивальыште «Ну, мо вара?» койдарчык мурым муреныт да кумылаҥдыше приз дене палемдалтыныт. Ончаш толшо калыкым артист койышышт дене куандареныт.
Илья тений икымше гана парт коклашке шинчын. Шиялтыш дене шокташ тунемеш. Тудым Л.И.Данилова семӱзгар дене палымым ышта.
Тихон 4 ияш. Тудо Сотнур селасе 3-шо номеран «Пеледыш» йочасадыш коштеш. Изи рвезе, изаже-влакым ончен, пырля мураш, кушташ тырша.
Йоча-влакым аралыме тӱнямбал кечылан пӧлеклалтше «Поющая семья» район фестивальышке еш дене кажне ийын ушнат. Ӱмаште кокымшо верыш лектыныт. Тушто «Чёрный кот», «Авамлан» мурым йоҥгалтареныт, келшыше презентацийым ямдыленыт. Конкурсышко ушнаш таратымыжлан да ямдылымыжлан «Пеледыш» йочасадын воспитательже Р.Г.Кузьминалан кугу таум ойлат.
Мӧҥгыштыштат кас еда сылне марий муро йоҥга. Авашт муралта, Никас семым лукташ тырша. Молыштат ушнат. Олег Бакутовын, Нина Николаеван, Михаил Веселовын семышт нунылан поснак келшат. Игнашевмыт еш (снимкыште) «Шайра» ансамбльыш коштеш.
– Шочшына-влак мӧҥгыштат, уремыштат, школыштат марла гына кутырат. Марий газет, журнал, книга-влакым лудыт. Вара изи шольышт, Тихонлан, каласкалат. Марий йӱлам ынышт мондо манын, ешыште марий пайрем-влакым эртарена: Роштом, Кугечым, – ойлат ача-ава.
Ешыште марла гына кутырымаш, пырля марий мурым мурымаш, марий книгам лудмаш икшывын чонышкыжо марий шӱлышым курымешлан шыҥдарат.
