Маша Васильева (снимкыште) Йошкар-Оласе 14-ше номеран гимназийыште 6-шо классым тунем пытарен. Марий ӱдыр почеламутым сылнын лудаш, кушташ йӧрата. «Шокто, гармонь» образцовый йоча куштышо ансамбльын чолга участникше. Сылнымут тӱням тӱҥалтыш класслаште тунеммыж годым йӧратен шынден. Марий серызе-влак С.Г.Чавайнын, В.Х.Колумбын почеламутыштым лудын, шочмо йылмын моторлыкшым келгынрак шижаш тунемын.
– Ешыште марла кутырена, сандене почеламутым куштылгын шарнен кодам. Марий йылмым туныктышо Людмила Николаевна Никитина раш да сылнын лудаш туныкта, – ойла Маша. – Оля акамын тӱрлӧ конкурслан ямдылалтмыжым ужын, мыйынат шке мастарлыкемым ончыкташ кумылем лектын. Почеламутым лудмаш артист койышым ешара. Кызыт калык ончыко лӱдде лектам. Кӧ пала, ала, илен-толын, артист лиям. Тидлан изинек ямдылалтам.
Е.ИВАНОВА.
