Телым илен лекташ куштылгырак лийже манын, кеҥежым кочкышым ситышын ямдылыман. Мый йӧратыме кроликем-влаклан сийым шапашленам. Те паледа, нуно могай оҥай улыт?! Кажне кечын куанен эскерем. Настя акам дене пукшена, йӱашышт вӱдым темена. Южо кроликше шинчашкетак онча, ниялтыкта, пуйто ойлыметым чыла умыла да «Тау» манеш. Пушкыдо пунан ныл йолан йолташым эре кидыш налме шуэш. Ик кроликиге дене шудо ораште моторын войзалтым. Шинчашкыже ончальымат, куанышын коеш. Тудланат войзалташ келшен, очыни.
Богдана МИХАЙЛОВА.
Морко, Купсола.
