10 февральыште Морко посёлкысо М.Н.Янтемир лӱмеш литератур да этнографий тоштерыште «Казаков лудмаш – 2023» районысо поэзий конкурс эртаралтын. Пайрем калык поэт, прозаик, кусарыше, журналист Н.И.Казаковын 105 ияш лӱмгечыжлан пӧлеклалтын. Конкурсыш шочмо марий йылмын ямжым шижын моштышо, сылнымутлан шӱман витле наре ӱдыр-рвезе чумырген.
Поэзий пайрем Миклай Казаковын илыш корныж нерген палдарыше презентаций дене тӱҥалын. Калык поэтын шочмо Кӱчыкэҥер ялысе артист-влак М.Казаковын икымше почеламутым возымыжым модын ончыктеныт. Морко посёлкысо Йоча усталык пӧртын гармоньчыжо-влак сылне сем дене пайремым сӧрастареныт.
Ты кечын кум пӧлемыште пайрем шӱлыш озаланен. Ӱдыр-рвезе-влак «Поэзий», «Прозо» да «Шке возымо почеламут» таҥаслаште мастарлыкыштым тергеныт. Кажне йоча артист койышыж дене поэтын сылнымутшым почын ончыкташ тыршен. Йочасадыш коштшо ньога-влакым ужаш поснак куанле лийын. Воспитатель-шамычын шочмо йылмым изинек йӧраташ кумылаҥдымышт куандарен. Ӱдыр-рвезе-влакын мастарлыкыштым аклаш куштылго лийын огыл гынат, эн тале участник-шамычым палемденыт.
«Поэзий» таҥасыште 6 ий марте ньога-влак коклаште Морко посёлкысо визымше номеран йочасадыш коштшо Елизавета Иванова сеҥышыш лектын. 7-12 ияш-шамыч коклаште Эҥерсола школын тунемшыже Мария Николаева ойыртемалтын. Нурӱмбал школ гыч Руслан Самигуллин 13-16 ияш-влак коклаште чылам ончылтен.
«Прозо» таҥасыште 7-12 ияш-влак коклаште Арын школын тунемшыже Елизавета Яковлева да ты школынак тунемшыже Иван Александров 13-16 ияш-шамыч коклаште икымше верым налыныт.
«Шке возымо почеламут» таҥасыште Эҥерсола школ гыч Ксения Бутенина сеҥышыш лектын.
«Ямде лий» газет деч кумылаҥдыше пӧлекым Купсола школ пеленысе йочасадыш коштшо Софья Ильиналан кучыктымо.
