11 февральыште «Российын ечыгорныжо – 2023» всероссийский тӱшка таҥасымаш 41-ше гана эртаралтын. Марий Элысе ечыгорнын тӱҥ площадкыже Звенигово олаште лийын. Медведево, Советский, Волжский, Морко, Курыкмарий да моло районла, Йошкар-Ола, Чуваш Республик гыч тӱжем наре еҥ ече ӱмбаке шогалын. Ийготым шотыш налын, спортсмен-влак 2,5,10 километрыш куржыныт. Нуным Марий Элым Вуйлатыше Ю.В.Зайцев саламлен. Сеҥыше-влак медаль да кубок дене палемдалтыныт.
2009-2012 ийлаште шочшо ӱдыр-рвезе-влак «Пионерская правда» газетын призше верч ече дене таҥасымашке ушнен кертыт. Йодмашым 20 февраль марте пуыман. Всероссийский таҥасымашын регионысо йыжыҥже Корта тунемме да тренировкым эртарыме базыште лиеш. Сеҥыше-влакым Марий Элын сборный командышкыже пуртат. Нуно Ижевск олаште эртаралтше финалыште Марий Элын чапшым аралаш тӱҥалыт.
