Ожно марий-влак тале сонарзе лийыныт. Икшывым ныл ияш улмыж годымак лӱйкалаш туныктеныт. Калыкыште тыгай ой коштеш: «Рвезе туран лӱен кертын огыл гын, пукшен огытыл». Сонарзын паша лектышыж дене марий калыкын илышыже кылдалтын.
Кызыт изи сонарзе-влак уке улыт гынат, школлаште лӱйкалымашлан тӱткыш ойыралтеш. Звенигово район Шолэҥер школышто «Юный стрелок» секций пашам ышта. Тудым историйым, обществознанийым да ОБЖ-ым туныктышо В.В.Виногоров вуйлата.
– Секцийыш 7-8-ше класслаште тунемше коло ӱдыр-рвезе коштеш. Йоча-влак яра жапыштым пайдалын эртарышт манын, тыгай пашам тӱҥалаш кумылаҥынам. Лӱй-калымаш – тиде спортын ик видше. Тӱткышым, чытышым вияҥда. Олимпиадыштат спортын тиде видше дене таҥасымаш уло. Мыйын шонымаште, «Юный стрелок» самырык тукымын чонышкыжо патриот шӱлышым шыҥдараш полша, – ойла Владислав Владимирович.
Кидыш пневматический винтовкым, пистолетым кучымо деч ончыч ӱдыр-рвезе-влак лӱйкалымашын вияҥ толмо корныжо, саргуралын тӱрлӧ улмыж дене палыме лийыт. Интернетыште тидын дене кылдалтше тӱрлӧ видеом ончат.
– Ончыкыжым, кыртмен ямдылалтын, «Зарница Поволжья» военный да спорт модышышко ушнаш шонена, – ойла секций вуйлатыше.
