Кирилл Иванов Шернур район Мустай кыдалаш школышто кудымшо классыште тунемеш. Физкультур урок тудлан поснак лишыл, вет рвезе спортлан изинек шӱман. Кужу дистанцийыш куржталаш йӧрата. Школысо, районысо таҥасымашлаште эре сеҥыше радамыш лектеш. Республикыштат шкенжым чолган ончыкта.
Кирилл футболла модаш кумылан. Урок деч вара арнялан кум гана тренировкыш вашка. Рвезе футбол командыште лидер: технике могырымат, писылык денат куандара. Спорт аланыште примерлан физкультурым туныктышо да тренер А.А.Паймаковым шотла.
– Мый Мустай ялысе «Нива» командын капитанже улам. Тушко школнан выпускникше, кугурак рвезе-влак коштыт. Опытым погышт манын, сайын модшо тунемше-шамычымат командыш ушаш тыршем. Кугурак-влакын модмыштым кажне гана шинча йӱлен ончымыштым куанен эскерем. Очыни, шукынжо «Мыят нунын семын талын моднем» манын шонат. А мый полшаш эреак ямде улам. Кирилл Иванов ончыкылыклан ӱшаным пуа. Вий-куатше, чытышыже лыҥак, школын чапшым кӱшнӧ куча. Тале спортсмен дене кугешныман,– ойла Артём Алексеевич.
