«Шочмо йылмына ныжыл муро гае чоным ырыкта, нелылыкым сеҥен, шулдыраҥаш да кугу кӱкшытыш шуаш тарата», – ойла Параньга район Матародо школышто 9-ше классыште тунемше Вероника Березина. Тудо марий йылме урокым йӧратен тунемеш. Келге шинчымашым налаш шонен, кажне урокышко куанен вашка. Марий йылмым туныктышо Н.А.Семёнова, тӱрлӧ йӧным кучылтын, йоча-влакым шымлаш утларак кумылаҥда. Лектышыжат сай. Тудын тунемшыже-шамыч тӱрлӧ конкурсышто мастарлыкыштым ончыктат да олимпиадылаште уш-акылыштым тергат. Вероникамат нунын радамыште ужаш лиеш.
– Икымше каласыме шомакем марла йоҥген. Тудо мый декем аван шӧржӧ дене толын. Мӧҥгыштӧ да йолташ-влак дене шочмо марий йылме дене кутырена. Йылмым вияҥдаш манын, шуко книгам лудам. Келге шинчымаш конкурслаште сеҥышыш лекташ полша, – ойла Вероника.
Х.АЛЕКСАНДРОВА.
Авторын фотожо.
