Школьник-влакын российысе толкынышт могай гына конкурсым огеш эртаре?! Жапет, мастарлыкет, ӱнарет веле ситышт. Теве Марий Турек школын тунемшыже Алия Ибрагимова чыла гаяк конкурсышто, проектыште усталыкшым ончыкта.
Чолга ӱдырын яра жапше йӧршын уке манаш лиеш. Ӱмаште «Большой школьный пикник» всероссийский фестивальышке миен. Тений «Смена» всероссийский йоча рӱдерыште «Кибер-лагерь РДШ» сменыште канен. «Ме геймофикаций, цифровой лӱдыкшыдымылык да моло нерген шуко оҥайым пален налынна. Кибер-турнир поснак кугу шарнымашым коден. World of Tanks ден Brawl Stars дене таҥасымашла эртеныт. Кибер-спорт – мемнан ончыкылыкна», – шарналта тиде жапым Алия.
Ӱдыр чолгалыкшылан кӧра Школьник-влакын российысе толкыныштын шочмо кечыжым Москошто эртаралтше «РДШ: Путешествие на Остров мечты» конкурсын финалыштыже пайремлен. «РДШ – территория самоуправления» всероссийский конкурсышто сеҥымыжлан «Орлёнок» всероссийский йоча рӱдерышке путёвкым пуэныт. Шыжым «Океан» йоча рӱдерышке «Экологика» программыш каяш ямдылалтеш.
– РДШ мыланем теҥыз тич йӧным пуэн. Тиде толкын миллион дене уста ӱдыр-рвезым шке йырже чумырен. Тудо у шӱлышым пӧлекла, шулдыраҥда. Пашам ышташ, кушкаш ит ӧркане веле, – ойла Алия.
