Даша Картузова Волжский район Приволжский школын 9-ше классыштыже тунемеш. «ВКонтакте» соцкылыште ӱдырын чолгалыкшым эскерен шогем. Школьник-влакын российысе толкыныштын еҥже, тӱрлӧ вере мастарлыкшым терга, сеҥымашыжат ятыр. Тудын дене тендамат палымым ыштем.
– Школьник-влакын российысе толкынышт нерген тӱҥалтыш класслаште тунеммем годымак шуко колынам. Визымше классыш куснымеке, школысо «Ступнени» ушемыш пуртеныт. Тудым Лидия Васильевна Картузова вуйлата. Ончыч кугурак-влакын пашаштым онченам. Кызыт шкежат ушнем, – ойла Даша.
«Ступени» ушемын ӱдыр-рвезыже-влак «Бабушки, будьте бдительны!», «Вам, любимые!», «Добрые блинчики», «Чудо для каждого» да шуко моло акцийым эртареныт. Изинек эмганен кушшо йоча-влакым пайремыш чумырат. Илалше-шамыч дек кажне арнян полшаш коштыт. Даша чолгалыкше дене пашалан кумылаҥда, примерым ончыкта. Республикысе йоча да самырык-влакын усталык полатыштышт волонтёр курсым эртен. «Мы – внуки Победы» всероссийский конкурсышто да моло вере сеҥышыш лектын. Яра жапыште спорт дене кылым куча, проектым воза, видеоролик-влакым ямдыла. Казак-влакын «Клинок» военно-патртотический клубыштын чолга еҥже.
– Школьник-влакын российысе толкынышт мемнам, самырык-влакым, чоным почын пашам ышташ туныкта. Ме тошкалтыш дене кӱзымӧ семын, изи ошкылым ыштен, сеҥымашыш шуына да ончыко ӱшанлын каена, – ойла Даша.
