Медведево район Цибикнур школ тоштерлан негызым 1962 ийыште туныктышо С.Г.Шалаев пыштен. Кызыт тудо кок пӧлеман. Иктыже этнографий дене кылдалтын, весыже историй ден краеведенийлан пӧлеклалтын. Ӱмаште тоштерым пӱтынек олмыктымо. Моткоч мотор тӱсым налын, экспонат-влакым моштен вераҥдыме. Йоча-шамыч тушко кумылын коштыт. Шкеныштым экскурсовод семынат ончыктат. Теве ме, 5-ше классыште тунемше-влак Вика Гут, Маша Старикова, Амелина Золотова да мый, икымше класслан кайык, янлык-шамыч нерген каласкаленна. Туштым туштенна, почеламутым лудынна, видеом ончыктенна.
«Пӱртӱс» пӧлкаште кайык, янлык чучыл-влакым ужаш лиеш. Шошым шокшо эл гыч пӧртылшӧ шулдыран йолташна-шамыч нерген каласкалаш экспонатлам кучылтына. Кундемна тӱрлӧ кайыклан поян. Икте иман але лышташан пушеҥге-шамычым шукш деч эмла, весе мландыште копшаҥгым кычалеш. Пыжашланат шкаланышт келшыше верым ойырат. Йоча-влаклан нунын илышышт нерген пален налаш пайдале да оҥай.
Тоштер – йоча-влакын йӧратыме верышт. Шочмо кундемым шымлаш, янлык, кайык илышым эскераш да нуным аралаш кумылаҥда.
Айвика КУЗНЕЦОВА.
Фото-влакым школ архив гыч налме.
