«Мыйын еш архивем» республикысе конкурс 1994 ий годсек эртаралтеш. Тидлан Марий Эл Республикысе «Эр вий» йоча да самырык-влакын организацийыштын ушемже вуйын шога. Историйым, тукымвожым, еш реликвийым шымлаш ӱжшӧ пашашке кугыеҥ-шамычат кажне гана кумылын ушнат. Тений конкурс молгунамсе семынак кок йыжыҥ дене эртаралтын. Эн ончыч участник-влак районыштышт таҥасеныт. Тушто ойыртемалтше 26 ешым республикысе конкурсышто акленыт.
«Мыйын еш архивем» кугезына-влак нерген шукырак пален налаш, родо-тукым кокласе кылым пеҥгыдемдаш, тошто документ ден фотосӱретлам кычалаш таратен. Кок номинацийланат кажныже кӱлынак ямдылалтын. «Еш реликвий» таҥасыште фото-влакым акленыт. Чылаже 22 паша пурен. Палыме фотохудожник-влак В.В.Тумбаев ден А.А.Шестаков нунын кокла гыч лу эн сайжым ойырен налыныт. Ты номинацийыште фотон темылан келшен толмыжлан, качествыжлан тӱткышым ойыреныт. Тиде таҥасымаште Волжский район гыч Томцевмыт еш (снимкыште) да Советский район гыч Салтаевмыт еш ончыл верыш лектыныт.
«Еш тоштер» таҥасыште участник-влак ешышт, кугезе тукымышт дене кылдалтше арверым, вургемым, семӱзгарым да молымат аклаш луктыныт. Южо реликвий тукым гыч тукымыш куснен. Тыгайже чонлан путырак шерге. Шернур район да Йошкар-Ола гыч Глазыринмыт икымше верым сеҥен налыныт.
Самырык ӱдыр-рвезе-влак тукымыштын эртыме корныштым, йӱлаштым пален да аклен кушкыт. Кугешнен каласаш лиеш: тугеже нуно тукымын ӱшанле ончыкылыкышт улыт.
