2026 ий мыланна ший капкажым почо. Ужар Пу Кишке дене чеверласен, Йошкар Тул Имне кудал пурыш. Чулым, писе, ончыко вӱдышӧ, пашам ышташ таратыше, вий-куатым ешарыше. Ожно калык тыге ойлен: «Имне – чылалан негыз. Имньыдыме лият гын, шуко азапым ужат». Ты вольык чыла гаяк неле пашам ыштен, садлан тудым тачат пагалат. Имне мыланна эрыкым, чытышым пӧлекла, кӱлеш годым кеч-могай сомылым жапым шуйкалыде ышташ туныкта.
«Имне – айдемын йолташыже», – тыгеат ойлат. Тудо мемнан гаяк ушан, умылен, кумылым шижын моштышо. Теве Оршанке район Кугунур села гыч Жанна Владимировна ден Игорь Витальевич Смирновмыт коло ий наре имньым ашнат да тудым лишыл йолташыштлан шотлат. Ача-аван йӧратымашышт икшывышт-влаклан куснен. А нуно шке йочашт-шамычын чонышкышт ты шижмашым шыҥдареныт. Снимкыште Кристина Игоревна ден Настя ӱдыржым Мансура лӱман имне дене пырля ужыда.
– Имньым изинек йӧратем. Нуным пукшем, кушкыж кудалыштам. Имне идалык толмылан моткоч куаненам. Ныл йолан йолташлан кугурак тӱткышым ойыраш сай амал, – ойла Настя Смирнова.
Смирновмыт кандаш имньым ашнат: Бунчук, Звезда, Мансура, Амелия, Замбия, Марибель, Венера да Бизель. Кажныже ойырте малтеш. Мутлан, Бунчук – ожо, тыматле, шкенжым кучен мошта. Мансура икшыве-шамычым йӧрата, арам огыл йоча-влак тудым кушкыж кудалыштыт.
– Артём эргына шым ияш улмыж годым имньым йодын. Машинам ужален, чомам налынна. Вологда лӱман ыле. Эргына имне спорт дене кылым кучаш тӱҥалын. Вара Воронеж областьысе имне заводышто тунем толын. Таҥасымашке кошташ тӱҥалын, сеҥымашыжат ятыр. Сарзе пашам ойырымыжлан кӧра ты сомылым ӧрдыжеш коден. Ожно спортивный урлык имне лийын гын, кызыт владимирский тяжеловоз урлыкым ашнена. Ынде имньым технике алмаштен гынат, патыр вольыклан пашам изиш ыштыктена, – ойлат Жанна Владимировна ден Игорь Витальевич.
Верысе йоча-влак имньын моторлыкшым ончаш чӱчкыдын коштыт. Вольык дене вашкылым муаш тунемыт, ешартыш шинчымашым налыт. Шукышт кушкыжыт, тазалыкыштым пеҥгыдемдат.
– Имне айдеме гай, шинчашкыже ончалат – чыла умылаш лиеш. Тудат мемнам шижеш, – ешарыш озавате.
Христина АЛЕКСАНДРОВА.
Фотом еш архив гыч налме.
