Татарстан Республик Агрыз район Пелемеш селаште чолга марий-влак илат. Йоча-шамычат марла мутланат, тӱвырам жаплен кушкыт. Тачысе лаштыкын унажат, уста марий ӱдыр Ирина Михайлова (снимкыште), лач тыгай. Тудо тений Буймо кыдалаш школышто 11-ше классым шӧртньӧ медаль дене тунем пытарен. Школ илышыште чолгалыкшым ончыктен, уш-акылжым ятыр конкурсышто терген. Марий йылме да литератур дене олимпиадыш шуко гана ушнен, сеҥыше радамыш лектын.
– Буймо школышко шым марий ял ден села Буймо, Пелемеш, Кӱанэҥер, Мандык, Кӧлегеш, Шуар, Ошвуй гыч тунемаш коштыт. Икмынярыштыже ансамбль-влак улыт. Мутлан, Буймо селаште — «Эр ӱжара», Кӧлегеш селаште — «Курмызак олык». А Пелемеш села «Ош вис-вис» дене кугешна. Мый тушко изиэм годымак мураш да кушташ коштынам. Тыгай уста коллектив-влак улмо шкешамым умылаш, калыкемын тӱвыраж деке лишкырак лияш, ваш эҥертен илаш, пайремым рӱж пайремлаш йӧным ышта, – ойла Ирина.
Ӱдыр дене тений Марий самырык тукым слётышто палыме лийынна. Вашмутланымаш гыч рашемын: Михайловмыт еш ялыштышт ик эн чолга. Ачаже Эдуард Иванович — Буймо ял шотан илемын вуйлатышыже, Марий мер каҥашын еҥже. Аваже Марина Семёновна Буймо школышто тӱҥалтыш класслам туныкта. Акаж ден изаже шке корныштым тошкат.
– Мӱкшым ончена, мыят ача-авамлан полшем. Пӧлек наборым ямдылена. Тушко мӱйым, шоптыр ден эҥыж вареньым, пергам, прополисым да шудо чайым пыштена. Уна-шамычлан тыгай пӧлек келша. Яра жапым пайдалын эртараш тыршена, спорт дене кылым кучена. Теве шукерте огыл еш да йолташ-влак дене пырля Агрыз ола марте 120 километрым велосипед дене кудалынна, – палдарыш ӱдыр.
Сайын тунемаш, мер илышыште чолга лияш, калык тӱвырам да йылмым аралаш – тыгай ӱжмаш дене Ирина тӱрыснек келша. Марий ӱдырлан келшыше тунемме тӧнежыш тунемаш пураш, пиалан да таза лияш тыланена.
Оля МАЙКОВА.
Фотом еш архив гыч налме.
