– Изиэм годым ачам малаш вочмо деч ончыч мыланем кажне кечын книгам лудын. Мый колышташ моткоч йӧратенам. Карлсон нерген лудмыжым тачат сайын шарнем, – ойла Пошкырт кундем Мишкан район Чорай марий гимназийын 4-ше классыштыже тунемше Анатолий НИКОЛКИН (снимкыште).
Рвезе ынде шкеже уло кумылын лудеш. Йоча-влаклан пӧлеклалтше, пӱртӱс нерген книга-шамыч поснак келшат. Толя кеч-могай произведенийым сылнын лудаш йӧрата. «Ялкайн лудмаште» кажне ийын сеҥыше радамыш лектеш.
Шымлымаш пашаланат шӱман. «Поиск – 2021. Наука – это поиск истины» шанче-практике конференцийыште «Деревня Лепёшкино в прошлом и в настоящем» пашаж дене 1-ше верыш лектын.
