Кугезе кочам Ишим Самутович Самуткин (снимкыште) – Граждан да Кугу Ачамланде сар-влакын участникше. Тудо 1901 ийыште Буймо ялеш шочын. 1920 ийыште кочамым Йошкар Армийыш налыныт. 1924 ий марте 18-ше стрелковый полкышто служитлен. 1940 ийыште Ишим Самутович ешыж дене Карел-Финн республикыш илаш каен. 1941 ийыште тудым фронтыш наҥгаеныт. Тале ургызо лийын. Салтак-влакын вургемыштым ачалаш тудлан ӱшаненыт. Ургымо машинаже сар мучко кӱдыньжак коштын. Тыгак тудым сай плотник семын акленыт. 1942 ий 5 январь гыч кочамын полкшо окруженийыш логалын. Тушман-влак кочамым да йолташыже-шамычым пленыш налыныт. Нуным Гомель лагерьыште кученыт. 1943 ий 10 октябрьыште совет войска-влак утареныт. Плен деч вара кочам уэш фронтыш пӧртылын.
Ишим Самутовичым «За освобождение Варшавы» медаль дене палемденыт. Берлиным авалтен налмаште талын кредалмыжлан «За взятие Берлина» медаль дене суапландареныт. 1945 ийыште сеҥымаш дене шочмо ялышкыже пӧртылын.
Мый кугезе кочамын лӱддымылыкшӧ да патырлыкше дене кугешнем. Тыныс илышым арален кодымыжлан шӱм гыч лекше таум ойлем.
Роман БАШИРОВ.
Татарстан, Агрыз, Буймо.
