Тений пакчасаскана лектышыж дене чо-от куандарыш. 60 метр кужытан пареҥге йыраҥ гыч ныл мешак шолдыра вожсаскам поген нална. Тыгай йыраҥже – 36. Вольыклан пукшышашлан ушмен 5-6 килограмман шочын. Кешырым нигуш чыкаш. «Клавдия» сорт кияр лектышыж дене кызытат куандара. Шке жапыштыже поген от нал гын, кабачок гай кугу лиеш. Моланжым мый палем: кочам келге мландым кӱнчен, тушко шуко терысым оптен да бетон пучым ӱмбаланже шогалтен коден. Тушечын кызытат шуко шокшо лектеш. Кеҥежым мыят яра киен омыл: йыраҥлаште шӱкшудым кӱрынам, вӱдым шавенам, кешырым шуэмденам.
Даша СОШИНА.
Морко, Купсола.
