Республикысе технике усталык рӱдерын тунемшыже-влак Санкт-Петербург гыч черетан сеҥымаш дене пӧртылыныт. Тушто радиотехнический дисциплиныла дене всероссийский шанче-технике олимпиаде эртаралтын. Таҥасымашке Российысе 29 тунемме тӧнеж гыч 124 икшыве ушнен. Марий Элын командыштыже лу ӱдыр-рвезе лийын (вуйлатыше – О.П.Дубникова). Шке ийготан-влак коклаште Данила Василенко икымше верым сеҥен налын, Роман Баданов – кокымшым, Александр Ильин – кумшым. Марий Элын командыже кумшо верыш лектын.
Л.НИКОЛАЕВА ямдылен.
Фотом рӱдерын архивше гыч налме.
