«Шонанпыл» манмек, шинчаончылно ӱшаным пуышо, волгыдо чевер тӱсым ужына. Оршанке районысо Кугунур кундемыште тудо 35 ий ончыч пӱгӧ семын нӧлталтын да ты верым таче кечынат сӧрастара. Шомакем «Шонанпыл» йоча ансамбль нерген.
Ансамбльын корныжо 1989 ийыште тӱҥалын. Тунам школ пашаш хореограф Л.Е.Акулова ушнен. Тудо да пырля пашам ыштыше В.М.Авдеев мураш-кушташ йӧратыше тунемше-шамычым иквереш чумыреныт. Лариса Евгеньевна таче мартеат ансамбльым вуйлатыме сомылым чон йӱлен шукта. Мо оҥай, эше тунамак кугурак-влак репетицийыш шольышт ден шӱжарыштым кондаш тӱҥалыныт. Южо еш гыч ансамбльыш 2-3 йоча дене вашкеныт. Ондак школышто выступатленыт. Вара, ӱдыр-рвезе-влакын мастарлыкыштым шекланен, районыш веле огыл, вес кундемышкат ӱжаш тӱҥалыныт. Ик эн тора кундемыш 1993 ийыште Петрозаводск олашке кугу фестивальыш ӱжмашым налыныт. «Тугеже мемнам палат, мемнам ӱжыт» шонымаш эшеат тыршаш да вияҥаш кумылым луктын.
Тиде ийынак чолга музыкант Е.С.Рыбакован ансамбльыш ушнымыж дене репертуар эшеат пойдаралтын. Илен-толын, шкежат сем-влакым возаш кумылаҥын. Шуко семлан мутым тӱҥалтыш класслам туныктышо Р.А.Кудрявцева сера. Тӱшкан, уло вий дене кыртмен пашам ыштымын лектышыже калык пагалымашым сулен.
– Кызыт ансамбльыш 62 йоча коштеш. Нуным кум тӱшкалан шелме: 1-2-шо, 3-4-ше да 5-11-ше классла. Тунемше-влак марий муро ден куштымашым, финн-угор калыкын тӱвыражым, кызытсе муро ден куштымашым лончылат да тунемыт. У номер-шамыч койынак ешаралтыт. Репетиций-влакым кажне тӱшка дене арнялан кум гана посна эртарена. Палемдыман, йоча-влак семӱзгар денат устан шоктат, – ойла Л.Е.Акулова.
Тачысе кечылан «Шонанпыл» йоча образцовый ансамбль – ятыр конкурсын лауреатше да дипломантше. 2015 ийыште Эстонийысе Выру олаште «Калык куштымаш» тӱнямбал фестиваль гыч лауреат лӱм дене пӧртылыныт. «Шонанпылын» выступленийлаж деч посна районысо нимогай мероприятий ден концерт огыт эртаралт. Моло вереат эреак шокшын, совым рӱж кырен вашлийыт.
Ӱдыр-рвезе-влак, школым тунем пытарен, ансамбль гыч каят гынат, огыт йом. Ятырын тӱвыра аланым ойырен налыт да сымыктыш тӱням шӱдыр гай волгалтарат. Нунын коклаште – палыме мурызо-влак Марина Садова, Виктория Мочалова, Александр Марков, тыгак мурсем аланыште икымше ошкылым ыштыше-шамыч Ксения Черёмушкина, Данил Кудрявцев, Никита Козлов…
35 ий йоча коллективым пеҥгыде вий-куатан, шке пашажым нимучашдымын йӧратыше айдеме веле кучен кертеш. Ансамбль вуйлатыше-влак – музыкальный вуйлатыше Е.С.Рыбакова ден хореограф Л.Е.Акулова – тидым шукертак пеҥгыдемденыт. Нуным «ансамбльын шӱмжӧ да кумылжо» маныт. Уста коллективын вияҥме корныштыжо школ, район, туныктымо пӧлкам вуйлатыше, туныктышо-шамыч, кажне ача-ава нунылан пеҥгыде эҥертыш лийыныт. «Шонанпыллан» кугу кӱкшытым, у сеҥымашым, сай лектышым да кужу ӱмырым тыланена. 35 ияш лӱмгечыда дене шокшын саламлена!
Пайрем концертыш 7 апрельыште 16 шагатлан Йошкар-Оласе Ленин лӱмеш тӱвыра полатыште вучат.
Кугунурын «Шонанпылже»
