Кажне еш тӱрлӧ да ойыртемалтше, но нуным икте уша – йӧратымаш. Еш пушеҥгысе укш гай. Кажне еҥ тӱрлӧ семын вияҥеш гынат, вожышо – икте. Тыгак Волжск олаште илыше Александровмыт еш нерген ойлаш лиеш. Светлана Николаевна ден Евгений Васильевич, икте-весын куанжым, ойгыжым лош пайлен, сеҥымашлан куанен, 14 ий пырля илат. Ныл икшывышт уло.
Келге шинчымаш — волгыдо ончыкылык
Озавате ӱмыржӧ мучко шинчымашым келгемда, манаш лиеш. Школ деч вара И.С.Палантай лӱмеш тӱвыра да сымыктыш колледжыш курчак дене модшо артистлан тунемаш пурен. Вара Н.К.Крупская лӱмеш Марий кугыжаныш пединститутышто воспитательлан тунем лектын. Умбакыже шинчымашыжым И.Н.Ульянов лӱмеш Чуваш кугыжаныш университетыште келгемден. «Государственное и муниципальное управление» специальностьым налын. Йочасадыште воспитательлан, музыкальный вуйлатышылан, хореографлан латик ий пашам ыштен. Кызыт йоча дене шинча. Моткоч усталык шӱлышан. Тыгаяк ешыш марлан лектын. Пелашыже Межрегиональный открытый социальный институтым «Защитник информации» специальность дене тунем пытарен. Кызыт «Регион Системы Безопасности» организацийыште инженер-проектировщиклан пашам ышта. Вате-марий икшывыштын ончыкылыкышт верч тургыжланат, тӱрлӧ могырым вияҥаш йӧным ыштат.
Степан Волжск оласе лицейыште 8-ше классыште тунемеш. Математике дене келге шинчымашым налеш. Физике, англичан йылме дене олимпиадыште сеҥыше радамыш лектын. Тыгак музыкальный школышто фортепиано дене шокта.
– Ты семӱзгар мыланем эн лишыл. Паҥга-влакым темдалат – ныжылге деч ныжылге сем лектеш. Чон кана да куана, – ойла рвезе.
Александр шольыжо 6-шо классыш вончен. Капкылжым кечын пеҥгыдемда, карате дене кылым куча. Сеҥымашыжат уло. Школ деч вара художественный школышто усталыкшым вияҥда: сӱретлаш тунемеш. Шочмо кундемын мотор пӱртӱсшым, лишыл еҥ-шамычым возаш поснак йӧрата.
Надя 3-шо классыште шинчымашым пога. Музыкальный школышто скрипка дене шокта. Молан лач ты семӱзгарым ойырен?
– Надюша изиж годым кидыш гитарым чӱчкыдын налын. «Тиде мыйын скрипкам», – манеш ыле. Кызыт шонымашыже шукталтын, – шарналта Светлана Николаевна.
Богдан эше ик ият пелаш веле. Аваж дене пырля мӧҥгыштӧ шуаралтеш.
Лишыл еҥ пелен
Александровмыт жапым пырля эртараш йӧратат. Кеч-могай пашам тӱшкан ыштат. Конкурслашкат еш дене ушнат.
– Ӱмаште шыжым «Это у нас семейное» конкурс нерген телевизор гоч пален налынна. Тидлан тӱрлӧ заданийым ышташ кӱлын. Ме кумло ик видеом войзенна. Тыге икте-весынам сайынрак пален налынна, икте-весылан ӱшанлынрак эҥерташ тӱҥалынна. Аванат Алевтина Михайловна Актуганова ушнен. Тидыже эшеат куанле, – ойлат вате-марий.
Тыршымышт лектыш дене куандарен. «Мамин праздник», «Спасатели», «Спорт» таҥаслаште ойыртемалтыныт. Нунылан телевизорым, проекторым, планшетым, смарт-шагатым, спорт сумкам кучыктеныт. Могай шерге пӧлек-влак!
Полуфиналыш лекмеке, Уфа олашке ӱжыныт. Александровмыт тушеч у шӱлыш, у кумыл дене пӧртылыныт.
– Шуко шочшан еш улына гынат, нелылыкым ом шиж. Ме икте-весынам пагалена, йӧратена, вашла полшена. Кеч-могай ошкылымат пырля ыштена, – ойла озавате.
