Кеҥеж. Уремыште пеш шокшо. Саска кӱмӧ жап. Маскан омо пытенат, карнышт-карнышт кынелеш. Эр кочкышым ышта. Куршым налын, чодырашке ошкылеш. Маскалан эҥыжым погаш келша. Адакшым вержымат пала. Пеш торашкак ок ошкыл, лӧзаҥ шушо саска верыш миенат лектеш. Янлык, йывыртен, шке семынже муралтен, эҥыжым пога. Шытыр-шотыр шоктен, ала-кушеч Рывыж толын лектеш.
– Салам, Маска тос! Кузе илымаш-кутырымаш? – чоялана Рывыж.
– Поро жапет лийже! Тый молан яра коштат? Кеҥеж кечын жапым моштен кучылтман. «Кеҥежым пӱжвӱдым йоктарет гын, телым ӱстел чесет поян лиеш» манын, арамлан огыл ойлат. Тол лишкырак, шогал воктекем. Саскам погаш полшо, – шылталенрак каласа Маска.
Рывыж вуйым ок шупш. Коктын куршым пеш писын темат.
– Рывыж тос, айда мый декем унала. Мӱй дене чайым йӱктем, – темла чодыра оза.
– Мый нимыняр тореш омыл. Уло кумылын мием, – келша кужу поч.
Маскан суртыш писын толын шуыт. Суртоза ӱстелым погаш тӱҥалеш. Могай сийже уло, чыла нумалеш. Ты жапыште Рывыж емыжан куршым руалта да лектын кудалеш. Маска, чесым ямдылен шуктымеке, йолташыжым ӱстел коклаш ӱжаш тарвана. Но ны Рывыж, ны емыж уке. Тудын кумылжо йӧршеш вола.
– Тиде илышыште кӧлан ӱшанаш лиеш?! Молан ме икте-весым тыге куштылгын ондален кертына?! – уло йӱкын кычкырал колта.
Рывыж, сылне чодыра аланыш миен шумеке, эҥыжым авызлаш тӱҥалеш. Но саскан тамже тудлан йӧршеш ок келше. Рывыж сырен кая, чурийвылышыжат йошкарге-нарынче сыным налеш. Пычкемышалтмеке, саскан куршым Маскан суртшо воктеке намиен шында. Но сын-кунжо йошкар-нарынче тӱсанак кодеш. Калыкыште арамлан огыл ойлат: «Еҥлан осалым ит ыште, шкаланет пӧртылеш».
Юля ЯГОДАРОВА.
Советский, Кельмаксола.
Э.Ямбаршеван сӱретше.
