Ковам Серафима Николаевна Конакова 1940 ийыште шочын. Сар тӱҥалме годым тудлан улыжат ик ий лийын. Ончылно куштылго огыл илыш вучен. Ешыште вич йоча кушкын. Кажныжым изинек мланде пашалан туныктеныт. Сар деч вара элым вияҥдыме пагытыште ковамланат моло семынак шуко сомыл логалын. Пасу пашам ыштен, вольыкым ончен, фермыште аважлан полшен. Илышыштыже ятыр йӱштӧ-шокшым ужаш логалын, но поро чонжым арален коден моштен. Шым икшывыже, латвич уныкаже да лу кугезе уныкаже чӱчкыдын унала коштына. Вашлийме годым илышын кажне татшым аклаш, икте-весе дене келшен, вашла полшен илаш кӱлмӧ нерген ойла. Ковам дене моткоч кугешнем.
Роман МИХАЙЛОВ.
Шернур, Эпак.
