21 мартыште Морко район Унчо селаште илыш шолын, вет тушто кундемнан тӱрлӧ районжо гыч толшо йоча-влак Ӱярням ужатеныт. Икшыве-шамычлан ты пайремым Республикысе марий тӱвыра рӱдер шукертсек эртара. Тений Советский, Параньга, У Торъял, Волжский ден Морко районласе индеш школын командыже пайремышке ушнен. Йоча, туныктышо да уна-влакым Марий Эл Республикысе Кугыжаныш Погынын депутатше, «Передовик» СХА-н председательже Ю.А.Игнатьев, Унчо кыдалаш школын директоржо А.С.Григорьев да Республикысе марий тӱвыра рӱдерын вуйлатышыже В.Г.Петров саламленыт.
Йоча-влак тӱрлӧ конкурсым эртеныт. Икымше «Ӱярня такмак-баттл» лийын. Йоча-шамыч ты пайремлан келшыше такмак-влакым муреныт. «Ӱярня мелна» конкурсышто тунемше-шамыч ямдылен кондымо мелнаштым калыклан ончыктеныт. А мелнаже могай гына лийын огыл?! «Ӱярня кува» конкурс утларак творческий шӱлышан лийын. Кажне команде Ӱярня кувам ямдылен конден да мурымаш-куштымаш дене телым ужатен колтымым, шошым вашлиймым калык ончылно модын ончыктен. Тылеч вара изижат-кугужат ӱярнявара дене мунчалтеныт, паҥгам перен модыныт, мешак дене тӧрштылыныт, вӱдвара дене вӱдым нумалыныт да моло оҥай модышлаште вий-куатыштым тергеныт. Пайремым кугу ӱярня оҥго дене мучашленыт.
«Ӱярня такмак-баттл» конкурсышто ойыртемалтыныт:
1 вер – Б.Р.Ахматьянов лӱмеш Параньга кыдалаш школын «Кечыйол» командыже.
2 вер – У Торъял тӱвыра да каныме рӱдерын «Онар тукым» командыже.
3 вер – Советский районысо Ӱшнӱр кыдалаш школын «Ӱшан» командыже.
«Ӱярня мелна» конкурсышто сеҥеныт:
1 вер – У Торъял тӱвыра да каныме рӱдерын «Онар тукым» командыже.
2 вер – Волжский районысо Пӧтъял кыдалаш школын командыже.
3 вер – Морко районысо Шеҥше кыдалаш школын «Кечыйол» командыже.
«Ӱярня кува» конкурсышто сеҥышыш лектыныт:
1 вер – Параньга районысо Кугу Пумарий кыдалаш школын «Самырык тукым» командыже.
2 вер – Б.Р.Ахматьянов лӱмеш Параньга кыдалаш школын «Кечыйол» командыже.
3 вер – У Торъял тӱвыра да каныме рӱдерын «Онар тукым» командыже.
Сеҥыше-влаклан дипломым, кажне командылан шергакан пӧлекым кучыктеныт. Тыгай мероприятий йоча-влаклан веле огыл, кугыеҥ-шамычланат моткоч келшен.
Н.ЛАВРЕНТЬЕВА.
Фотошто: Волжский районысо Пӧтъял кыдалаш школын тунемшыже-влак.
Авторын да И.РЕЧКИНЫН фотошт.
