Шошо пагыт пеленже шуко пашам конда. Емыж, пакчасаска лектыш куандарышт манын, ондакак ямдылалтман. Нӧшмым ойырыман, ӱдыман, росотам кусарен шындыман… Кажне сомылым кӱлеш семын шуктет гын, лектышат лиеш. Шукынжо кичкым февраль мучаште да март тӱҥалтыште ӱдат. Но тидын дене паша огеш мучашлалт. Ончылно росотам кусарымаш вуча. Кузе да кунам тидым ыштыман? Могай мландым ойырыман? Ой-каҥашым пакчазе, ялозанлык шанче кандидат Э.И.Пирогова пуа:
– Нӧшмым ӱдымек, тудо 5-7 кече гыч нерым колта. Палемдыман, виянрак лекше манын, ӱдымӧ деч ончыч лум вӱдыштӧ икмыняр кече кийыктыман. Тыгодымак нӧшмӧ «илана». Кок арня гыч икымше лышташ палдырна. Эше кок арня наре кушмек, тӱҥ лышташ куандараш тӱҥалеш. Ик тылзе гыч кушкылын вожшым пӱчкаш да вес вере кусараш лиеш.
– Озымым кусарашлан мланде могай лийшаш?
– Тӱҥжӧ – пушкыдо лийшаш. Ӱяҥдышымат чын ыштен моштыман. Тӱрлӧ удобренийым оптеда гын, нӧргӧ кушкылын вожшо йӱлен кертеш. Ик эн куштылго да пайдале ӱяҥдыш: 1 ужаш ошма, 3 ужаш гыч торф ден рок. Тушко ик кормыж ломыжым ешарен варыман.
– Кызыт эше могай сомылым ыштыман?
– Кызыт известка раствор дене олмапу йытырым чиялташ тӱҥалман, тудын йырже лумым оптен тошкыман. Тений шошо мемнан кундемыш вараш толеш. Лумым оптымо дене олмапу вашке огеш помыжалт. Шоптырвондын 25 сантиметран укшыжым пӱчман да мландыш урыман. Тыге тудо вожым колта, а май тӱҥалтыште шындыман. Пакча паша ӱзгарым ончылгоч ямдылен шогыман. Шаньык, кольмо да моло арверым тергыман, росотам кусарен шындаш яшлыкым але атылам ямдылыман. Шошо паша куаным кондыжо!
