Кызытсе саманыште увер моткоч писын шарла. Тидлан интернет полша. Но свежа чия пушан, тӱрлӧ сынан сылне газетым садикте кидыш налме шуэш. Тудо ийла дене аралалтеш да эртыме корным шарныктара. Марий Элыштат тӱрлӧ ийготан лудшылан келшыше газет ден журнал-влак савыкталтыт. Йоча-шамычлан – «Ямде лий». Кандаш лаштыкыште кажныже шкаланже келшыше уверлам, чоным кандараш да вуйым пудыраташ таратыше статья-шамычым муын кертеш. Газет Марий Элыште да Башкортостан, Татарстан, Удмурт республиклаште илыше марий йоча-влакын усталыкыштым вияҥдаш йӧным пуа. Чолга юнкор-шамыч шонымашыштым, куан ден ойгыштым лудшо-влак дене пырля пайлат.
Марий Турек район гыч Элина Сомина ден У Торъял округ гыч Дария Лихачева (снимкыште) музыклан шӱман улыт. Нуно Национальный сымыктыш гимназийыште тунемыт да кӱсле дене шоктымо мастарлыкыштым вияҥдат. Шочмо марий йылме дене лывыргын мутланыше, марий койышым мероприятийлаште куанен ончыктышо ӱдыр-влак «Ямде лий» газетын кажне номержым тӱткын лудыт. 2026 ийын кокымшо пелийыштыжат йоча газет дене пырля лияш шонат. А тый «Ямде лийлан» подпискым ыштенат?
Катя СЕРГЕЕВА.
Авторын фотожо.
