Ме класс дене Усола ял гыч Элпанур марте кудалынна. Эн ондак мыланна Элпанур школ мучко экскурсийым эртареныт. Обелискым онченна, вара, чодыра гоч ошкылын, школ директор М.А.Богдановын аваж дек унала пуренна (снимкыште). Тудо верысе школышто пашам ыштымыж нерген оҥайын каласкален.
Умбакыже корнына Марий Кошпай ялыш шуйнен. Тушеч татар Мераҥсолашке вашкенна. Кугу Ачамланде сарыште лийше-влаклан шогалтыме стелым онченна, верысе книгагудыш пуренна. Каналташат жапым муынна. Тулотым ылыжтенна, чайым, кочкышым шолтенна. Да мӧҥгеш чодыра гоч, поҥгым поген-поген, шочмо ялыш толынна. Тыгай поход чоным кужу жап ырыкташ тӱҥалеш.
Лиана ГОРДЕЕВА.
Параньга, Усола.
Фотом школ архив гыч налме.
