25 октябрьыште Йошкар-Оласе Самырык-влак полатыште «Марий КВН» эртаралтын. Мыскара пайремыште «Шернур патыр», Йошкар-Ола гыч «10-ка», Башкортостан Республик Мишкан район Ирсай школ гыч «У вий», Морко район гыч «Ӧлӧҥгӧ» команде-влак таҥасеныт. Кугыеҥ-шамыч дене пырля йоча-влакат модмашке ушненыт. Мутлан, «10-ка» командыште рӱдоласе 1-ше номеран школышто 1-ше «А» классыште тунемше Даша Попова лийын. Шернур районын чапшым тукым ака-шольо Екатерина ден Валентин Петуховмыт (снимкыште) араленыт.
– КВН модмашке марий йылме ден литературым туныктышо Светлана Мартыновна Максимова ушнаш темлен. Весела командыштына икте-весылан эҥертенна, полшенна. Мыланна модмаш пеш келшен. Шинчымашнам пойдаренна, у йолташ-влак дене палыме лийынна, – ойлат ака-шольо.
Екатерина ден Валентин Марисола кыдалаш школышто тунемыт. Шочмо Шӱдымарий ялысе тӱвыра пӧрт пеленысе «Каблучок» йоча куштышо ансамбльын участникше улыт. Вийыштым, уш писылыкыштым, мастарлыкыштым тӱрлӧ конкурсышто тергат. Чӱчкыдын сеҥыше радамыш лектыт.
Весела модмаште «Ӧлӧҥгӧ» команде ончылно лийын.
Оля МАЙКОВА.
Авторын фотожо.
