Шыже юзо виян. Пӱртӱсым тӱрлӧ тӱсан чия дене чиялтен, кундемлан вес сыным пуртен. Тиде шыжын моторлыкшо. Тыге идалыкын вес пагытше деч ойыртемалтеш. Шыже шӧртнялге-нарынче лышташлам мардеж почеш йоктара. Нуно южышто ныжыл вальсым пӧрдыт – юзо шыжым куандарат. Вара, лыпланен, тӱрлӧ вере тамле омо дене малаш возыт. Кайык-шамычымат шыже ӧрдыжеш ок кодо. Игыштым йол ӱмбак шогалтыше кайык еш мӱндыр корныш тарванен. Нуно шокшо элыш вашкат, мемнан дене чеверласат.
Тыге ик пагыт весым алмашта. Пӱртӱс телым вашлияш ямдылалтеш.
Елена ИШМАНОВА.
Татарстан, Агрыз, Кадрек.
