Йошкар-Олаш ӧрыктарыше янлыкым, шукш-копшаҥгым, кишкым да молымат чӱчкыдын кондат. Шукерте огыл пырыс-влакым ончаш темленыт ыле. Ик тыгай ончерышкыже мыят миен толынам.
– Мемнан дене 25 урлык 44 пырыс уло. Нуно ончерыш тӱрлӧ амаллан кӧра логалыныт: иктым осал оза деч налынна, весым уремыште муынна… Кажныжым эмленна, кӱлеш прививкым шынденна, айдемылан ӱшанышт манын, пырыс психолог дене пашам ыштена. Ме шкешотан приют улына манам гын, чынрак лиеш. Уна-влаклан пырысым пукшаш, ниялташ темлена. Ныл йолан йолташна-шамыч калык деч ноят гын, нунылан шылашышт, канашышт посна пӧлемым келыштаренна, – ойла ончер вуйлатыше Феликс Александрович Герц.
Пырыс-влак чынжымак тӱрлӧ улыт: кужу пунан да пундымо, тыглай да кӱчык чапан, йорга да ласка койышан… Айста эн ойыртемалтше вич янлык дене тендам палдарем.
Эльф сфинск – чулым, йоча-влак дене модаш йӧратыше пырыс. Тудо кошар да тӱжвал велыш тодылалтше пылышыж дене ӧрыктара. Ты урлык пырыс мӧҥгысӧ янлык да кайык дене кылым вашке муэш.
Аравийский мау – верблюд семын вӱд деч посна ятыр жап илен кертеш. Ты урлык пустыньысе ир пырыс деч лектын. Чӱчкыдын йылмым ончыкта. Тудын организмыштыже кочкышат, вӱдат ситымым тыге палдара.
Ты пырысын лӱмжӧ – Шурик. Ачаже – кошар неран, кугу пылышан, вичкыж да кужу почан ориентал урлык пырыс. Аваже – мейн-кун. Шурик ачаж да аваж деч эн сай койышым налын, йорга да весела улеш.
Скоттиш-фолд (але шотландский вислоухий пырыс) – кечыше пылышан пырыс. Мамык пунан кум тылзаш ты пырысигым Гуляш манын лӱмденыт.
Абиссинский урлык Ляля лӱман пырыс изи гынат, ты ончерыште прайд вуйлатыше. Пырыс-влак коклаште ырлыме йӱк шокта гын, вигак чараш вашка. Тудын деч ончыч ик янлыкат кочкаш ок тошт. Кӧ пырысым ончынеже гын, ты урлык лач келшен толеш. Тудын деч аллергий уке, маныт. Айдеме дене шкенжым ласкан, порын куча. Пунжо кӱчык, яклака.
Оля МАЙКОВА.
Авторын фотожо-влак
