Шернур округ гыч Васеевмыт еш мер илышыште, спортышто шкеныштым чолган ончыктат, усталык корныштат тӱвыргӧ. Зинаида Климентьевна ден Сергей Васильевич Шернур округ Шолэҥер ялыште шочын-кушкыныт. Кызыт Шернур посёлкышто илат. Мужыраҥмыштлан — латныл ий. Кок ӱдырым ончен куштат.
Кажнын – шке сомылжо
Зинаида Шернур округ администрацийын тӱвыра пӧлкаштыже тӱҥ бухгалтерлан пашам ышта. Районысо тӱвыра пашаеҥ-влак кокласе профсоюз организацийын председательже, Самырык-влакын парламентыштын еҥже, тӱвыра пашаеҥ-влак кокласе общероссийский профсоюзын самырык-шамычын советыштын еҥже, волонтёр, поро кумылым ончыктышо рӱдер пеленысе самырык еш клубын участникше. Сергей автовышкыште машинистын сомылжым шукта. Полина ӱдырышт 2-шо номеран Шернур школышто 8-ше «Б» классыш вончен. Волейбол дене модаш кумылан. Алина 2-шо «А» классым тунем пытарен. Районысо йоча спорт школ пеленысе ече дене ӱчашымаш секцийыш коштеш. Ӱдыр-влак «Грация» школ ансамбльын участникышт улыт.
Лектыш куандарыше
Васеевмыт жапым пырля эртараш тыршат.
— Тӱрлӧ мероприятийыш рӱж ушнена. Куржталына, конкурслаште мастарлыкнам тергена. Икманаш, районын мер илышыштыже чолгалыкым ончыктена. Тиде икте-весе кокласе вашкылым пеҥгыдемдаш полша. Ончыкыжым, иквереш погынен шинчын, ты татым порын шарнаш тӱҥалына. Нылытын иквере улмо годым чонлан сай. Садлан чодыраш поҥгылан коштына, олыкышто саскам погена, кундемым шымлена, — палдарыш озавате.
Ты мут лектыш дене пеҥгыдемдалтеш. Сеҥымашышт ятыр. Мутлан, кодшо ийын «Шернур! На старт» еш фестивальыште икымше верым сеҥен налыныт. «Россия – страна возможностей» регионысо проект радамыште эртаралтше ик фотоконкурсышто «Фотопамять» таҥасыште 3-шо вер дене палемдалтыныт.
Ик велыш ончат
Еш, тукым кыл – эн пеҥгыде вий. Тидым тачысе лаштыкын геройжо-влак раш умылат.
– Ме ваш полшен, умылен, эҥертен илена. Пиалымат, ойгымат икте-весе коклаштына пайлена. Ончыкылык шотышто ик велыш ончена, – маныт Васеевмыт.
Оля МАЙКОВА.
Фотом еш архив гыч налме.
