Кочам Юрий Иванович Антропов «Искра» колхозышто зернотокышто машинистлан пашам ышта. Чонжылан келшыше сомылжо нерген мыланна, уныкаже-влаклан, ятыр оҥайым каласкала. Ты неле пашаште тӱткылык кӱлеш, ме тидым раш палена. Тыгак кочам — тале кидмастар. Мастаргудыштыжо мо гына уке?! Тошто ӱзгар-влак, сурт коклаште кучылташ келшыше шке ыштыме арвер-шамыч. Чылажат шке верыштыже аралалтеш.
Ковам – Валентина Ефремовна Антропова. Йочасадыште 37 ий пашам ыштен. Кажне кечын ньога-влакым у сомыллан туныктен. Тӱнян моторлыкшым ужын моштышо, илышлан йывыртыше ятыр ӱдыр-рвезым куштен. Ковам дене пырля жапым эртараш келша. Коктын тӱрлена, кочкаш шолтена. Тыгодым чон почын кутырена. Поро, мунло, еш верч тургыжланыше кочам ден ковамым моткоч йӧратем да нунын дене кугешнем.
Вика АНТРОПОВА.
Кужэҥер, Йӱледӱр.
Фотом еш архив гыч налме.
Снимкыште: Юрий Иванович ден Валентина Ефремовна – уныкашт-влак дене пырля.
