Морко район Эҥерӱмбал ялеш шочшо Аркадий Букетов-Сайн лирике кумылан поэт лийын. Тений, 6 январьыште, шочмыжлан 90 ий темын. «Поэзий сылнылыкше дене сымыстара», – ачамын тыге ойлымыжым шуко гана колынам. Почеламутым кок ияш улмыж годымак йӧраташ тӱҥалын. А.Пушкинын марий йылмыш кусарыме «Эр» почеламутшым куанен лудын. Вара шкежат возаш тӱҥалын. Икымше почеламутшо Азъял школышто тунеммыж годым шочын. Шочмо ялышкыже икана Семён Вишневский толын улмаш. Аркадий Иванович МАССР-ын калык поэтшылан почеламутшым ончыктен. Тыге возаш утларак кумылаҥын.
1952 ийыште Морко педучилище деч вара Н.К.Крупская лӱмеш Марий пединститутын историко-филологический факультетышкыже тунемаш пурен. Дипломым налмеке, Морко районысо Шеҥше кыдалаш школышто руш йылме ден литературым, марий литературым, историйым туныктен. Урок деч вара «Сылнымут аршаш» кружокым вӱден. Морко посёлкышто илымыж годым 1-ше номеран Морко школышто факультативный курсым эртарен, сылнымут дек шӱмаҥден.
Ачам мыланем пример лийын. Тудын гаяк ушан, чулым да уста айдеме лияш изинек шоненам. Ушыштем Аркадий Ивановичын мутшо эре пӧрдеш: «Марий улам, шочмо йылмемым чот йӧратем». Йоча-влак, марий йылмым куанен тунемза.
И.БУКЕТОВА-АЛВИЙ.
Кугешнем!
Кӧ ончылта пашаште жапым,
Налеш у кӱкшытым сеҥен,
Огеш луштаре илыш сапым –
Мый тудын дене кугешнем!
Тыгайын шӱм-чонеш регенче
Ок нал – шолеш пиал сескем.
Кид-йол модеш, паша волгенче
Шыжа, пеледышла йолген.
Станок мура тудлан у гимным,
Мыят у стихым пӧлеклем
Да сылнымут каваште лӱмын
Чатка у шӱдырым чӱктем.
