Морко район Арын школышко сылнымут «пушан» юж курымешлан шыҥен. Тушто марий сылнымутлан негызым пыштыше Сергей Чавайн туныктен. «Ямде лий» газетын ончычсо тӱҥ редакторжо, журналист, серызе Василий Крылов сылнымутыш ошкылым лач тушто ыштен. Кызыт «Сескем» кружок йоча-влакым юнкор пашалан кумылаҥда. Тудым тӱҥалтыш класслам туныктышо О.А.Васильева вуйлата (снимкыште – йоча-влак дене пырля).
– Урок деч вара йоча-шамыч дене шарадылан, ребуслан вашмутым кычалына. Шкеат шонен луктына. Марий книгам шергалына, марла почеламутым сылнын лудаш тунемына. Серызе-влакын пашаштым шымлена. Заметкылам возена, икте-весе дене каҥашен тӧрлена да газетышке колтена, – ойла Олимпиада Алексеевна.
Ӱдыр-рвезе-влак шочмо йылмын сӧраллыкше, шочмо кундем, верысе пӱртӱс, йӧратыме сомылышт, ача-авашт нерген возаш йӧратат. «Ямде лий» газетын толмыжым арня еда вучат да лаштыклаште лӱмыштым чон вургыж кычалыт. Тале юнкор-шамычын заметкыштым, йомакыштым, почеламутыштым куанен лудыт да нунын гай лияш тыршат. Кружокым арам огыл «Сескем» манын лӱмденыт. Тек изи тулойып кугу тулотыш савырна.
