Оршанке районысо Кугунур школ «Маршруты Памяти Дней воинской славы России» проектше дене Марий Эл Республикым Вуйлатышын грантше-влакын конкурсыштышт «Добровольчество в сфере гражданского патриотизма» таҥасыште сеҥышыш лектын.
Проектым школ директор Г.А.Садовина вуйлата. Пашан авторжо-влак: воспитаний паша шотышто директорын алмаштышыже Л.Г.Елькина, педагог-оформитель В.А.Павлов, 11-ше классым тений тунем пытарыше, юнармий отрядын командирже, волонтёр Настя Волкова.
Проект почеш ончыкыжым «Зал воинской славы» изи музейым почаш да тӱрлӧ мутланымаш да вашлиймаш гоч Кугунур школышто тунемше-влакын чонышкышт патриотизм шӱлышым шыҥдараш, буклетым лукташ, акцийым калык коклаште шараш, шоҥгыеҥ-влаклан полшаш шонат.
– Российын историйыштыже ятыр героический событий лийын. Нунын дене ме кугешнышаш улына. Ачамландынам чапландараш шонен, военный службым эртыше-влаклан тауштен, Воин чап кечым палемдена. Проект пашам 5-11-ше класслаште тунемше ӱдыр-рвезе-влак деч тиде теме дене шинчымашыштым тергымаш сынан йодыштмашым эртарыме гыч тӱҥалынна. Йоча-шамыч тӱҥ событий-влакым шарнат гынат, нунын нерген кумдан каласкален огыт керт. Но сар теме чоныштым корштара, ӱдыр-рвезе-влакын кугезе коча-ковашт нерген шарнымашым арален кодаш кумылышт уло манын раш умыленна.
Кызыт – 2020 ий. Лу ий эртымеке, Кугу Ачамланде сар нерген Воин чап кече-влак семынак историй дене учебникла, документальный кино-влак гоч гына пален налаш тӱҥалына. Сарын участникше-влак дене шинчаваш кутырымаш мыланна ок сите. Садлан нунын дене вашлияш шонена. Лач тыгай кутырымаш гоч йоча сар нерген чыным пален налын да кугезе коча-ковашт дене кугешнаш тӱҥалын кертеш, – палдарыш Людмила Геннадьевна.
