«Волгенче» всемарийский йоча куштышо ансамбльын участникше-шамычын сценыш лекмым ужмеке, марий калыкын патырлыкше шижалтеш. Йоча-влак усталыкышт гоч тӱвыра поянлыкым, куштымашын моторлыкшым ончыктат. Марий тӱвыран ончыкылыкшо кужу да тӱвыргӧ лиеш манын, ӱшаным шочыктат.
Самырык коллектив
2023 ийыште Марий Эл Правительстве Председательын алмаштышыже – республикысе тӱвыра, печать да калык-влакын пашашт шотышто министр Константин Ивановын темлымыж почеш, республик мучко эн чолга да уста ӱдыр-рвезе-влакым ик куштышо коллективыш чумыраш кутырен келшеныт. 2024 ийыште, видео-визиткым ончен, 55 йочам ойыреныт. 21-30 январьыште икшыве-влакым «Волгенче» рӱдерыште икымше гана чумыреныт, куштымо сменым эртареныт. Лектыш вигак палдырнен: смене мучаште ӱдыр-рвезе-шамыч Яков Эшпай лӱмеш Марий кугыжаныш филармонийыште концертым ончыктеныт.
Йоча-влакым «Волгенче» рӱдер пелен жапын-жапын погат. Лу кечыште шуко улан туныктат, чапланыше еҥ-влак дене палымым ыштат, концерт программым ямдылат. Тыге иктаж мероприятий годым икшыве-шамыч, районла гыч толын, вигак сценыш лектын кертыт.
Тачысе кече
Всемарийский ансамбльыште кызыт 89 йоча кушта. Нуным икымше кече гычак Елизавета Николаевна ден Александр Петрович Селивановмыт вуйлатат. Репертуарыште – лу утла номер. Йоча-влак российысе да тӱнямбал мероприятийлаш ятыр гана ушненыт. Шукерте огыл «Волгенче» всемарийский йоча куштышо ансамбль (снимкыште) Кугыжаныш Кремль полатыште эртаралтше «Танцуй и пой, моя Россия!» VIII всероссийский фестивальын гала-концертыштыже мастарлыкшым ончыктен.
Чолга рвезе
Куштымо годым йоча ушыштыжо шуко действийым шарнышаш: мурсем почеш чын тавалтыман, кидым лывыргын рӱзалтыман, умбакыже кудо велке тарванымым палыман, шыргыжалме нергенат мондыман огыл. «Волгенче» всемарийский ансамбльыш коштшо-влак чылажымат шот да радам дене шуктат. Кушташ йӧратыше ӱдыр-рвезе-шамычлан ты коллективыш ушнаш – кугу чап.
Параньга посёлко гыч Кирилл Гордеев (снимкыште) ансамбльыш шукерте огыл ушнен гынат, мастарлыкше сайынак палдырна.
– Мый Параньгасе йоча усталык школышко нылымше ий коштам. Вуйлатышына Лариса Руфимовна Габдулхаева тӱрлӧ сем почеш кушташ туныкта. Мыланем марий сем утларак келша. Садлан «Волгенче» ансамбльыш ушнаш йодмашым колтенна. Икымше кугу выступлением «Танцуй и пой, моя Россия» фестивальыште лийын, – ойла Кирилл.
Рвезе Параньга кыдалаш школышто 5-ше классыште чыла «визытанлан» тунемеш.
«Волгенче» всемарийский йоча куштышо ансамбль сценыште волгенче гаяк волгалтеш. Тек ончыкыжымат калыкым куандара.
Оля МАЙКОВА.
Фото-влакым еш да ансамбльын архивышт гыч налме.
