Пушкин карте нерген кугурак класслаште тунемше йолташем-влак деч шукертак колынам. 14 ийым темымем изин-кугун вученам. Жапым шуйкалыде, картым почынам. Туддене спектакльым, кином, концертым ончаш, экскурсий дене каяш, тоштерыш, ончерыш, эсогыл планетарийышкат пураш лиеш.
Кызыт Морко посёлкышто «Звездный» кинотеатр пашам ышта. Мыняр оҥай кином ончаш лиеш! Шукерте огыл еш дене «Письмо Деду Морозу» комедийыш миенна (снимкыште). У ий каникул жапыште Йошкар-Оласе Т.Евсеев лӱмеш Калыкле тоштерыш каяш шонена. Ожнысо илыш нерген пален налаш, тошто арверым ончаш моткоч оҥай.
Шукерте огыл уверым ужым: «Пушкин картым» уэмдыман. Тидлан «Госуслуги Культура» приложенийыш пурыман да «Подать заявление» кнопкым темдалман. 28 декабрь марте ыштен шуктыман. Йолташ-влак, вашкыза, вараш ида код!
Алина СУББОТИНА.
2-шо номеран Морко школ.
Фотом еш архив гыч налме
