Ме шке илышланна, шочмо суртланна гына огыл, пÿтынь тÿнялан мутым кучена. Пÿртÿс верч тургыжланен, тудым арален да пойдарен, мландым тÿзатымашке эше ик ошкылым ыштена. Кызыт экологий йодышлан кугу тÿткышым ойырат.
Звенигово район Чакмарий школышто 11-ше классыште тунемше Дарья Зинова экологий дене кылдалтше йодышым келгын шымла. Арам огыл ныл ий почела ты предмет дене районысо олимпиадыште сеҥыше-влак радамыш лектеш.
–Школышто экологийым посна предмет семын огына тунем. Биологийын да географийын ужашыже семын шымлена. Олимпиадылан Татьяна Николаевна Дмитриева сайын ямдылен. Тудлан – кугу тау, – ойла Даша.
Ӱдыр пÿртÿс лоҥгаште кошташ да кушкыл-влакым шымлаш моткоч йӧрата. Сӧраллыкым ончаш – икте. А шочмо кундемыште арулыкым эскерымаш – кÿлешан паша. Даша, тидым умылен, экологий акцийлашке ушна. Пырля тунемме йолташыже-влак дене школ, памятник йыр шÿкым эрыктат, клумбылашке мотор пеледышым, моло кушкылым шындат.
– Пытартыш ийлаште, шижалтеш, еҥ-влак экологий верч утларак азапланаш тÿҥалыныт. Мыят изирак надырем пыштем. Еҥын мландымбаке шÿкым кудалтымыжым ужамат, тыге ышташ ок лий манын умылтарем. Южгунам почешышт шке эрыкташ логалеш. Кызыт кажне гаяк ялышке шÿк контейнерым шынденыт. Тидланат йывыртенам. Ынде тор ик вере да вес вере кийылташ ок тÿҥал манын ÿшанем. Йоча-влак, шарныза: могай экологий, тугай тазалыкда, – ойла ÿдыр.
Христина АЛЕКСАНДРОВА.
Снимкыште: Даша ден туныктышыжо Т.Н.Дмитриева.
Фотом школ архив гыч налме.
