Миядык села Сиптык арка ден Баргызбаш эҥер воктене верланен. Тушто Галя ковам ила. Туддеке унала чӱчкыдын мием. Вет тушто эше кугезе ковам Алмабика Мустафиновна Янабаева ила. Тудлан – 88 ий, а мылам – 8 ий. Икте-весе дене пеш келшена. Кувавамын илышыж нерген шарналтен каласкалымыжым колышташ йӧратем. Тудо 11 ияшак ава деч посна кодын, ныл классым веле тунем пытарен. ӱмыржӧ мучко Крупская лӱмеш колхозышто дояркылан пашам ыштен. «Пашан ветеранже» лӱмым сулен налын. «Материнская слава» медальжат уло. Вич икшывым илыш корныш шогалтен. Кызыт кугезе ковамын 13 уныкаже да 26 кугезе уныкаже уло. Тудо кидпашаланат мастар, мураш йӧрата, мемнам тамле сий дене сийла. «Илыш пиалан, улан лийже, пырля илаш, икте-весылан полшаш кӱлеш», – ойла кугезе ковам.
Валерия ВАЛИШИНА.
Башкортостан, Дӧртыльӧ, Байгелде.
Фотом еш архив гыч налме
