Йоча-влакын сцене гыч почеламутым сылнын лудмыштым колышташ куанле. Южо изи артистын мутшо чонышкак логалеш. Мыскара произведений годым воштыл колтет, ойган гын, шинчавӱдым йышт ӱштылат. Тидыже лудшын усталыкшым, сылнымутым умылымыжым, тыршымыжым ончыкта. Шукерте огыл ик чолга ӱдырын «Баллада о матери» почеламутым каласкалымыжым эскераш пиал шыргыжале. Колыштмо годым каплан копыж-ж-ж чучын колтыш. Ӱдыр дене палыме лияш кумылаҥым.
Ангелина Королёва (снимкыште) Кужэҥер район Коҥганур школышто 4-ше классыште тунемеш. Дневникыштыже – чыла «визытан». Тудын усталыкшым шекланен, туныктышыжо Надежда Ивановна Горинова сылнымут мероприятийлашке уша. Ангелина районысо да республикысе конкурслаште ятыр гана ончыл радамыш лектын. Теве Андрей Дементьевын «Баллада о матери» почеламутшым лудмым видеош войзен, онлайн-конкурсыш ушнен да икымше степенян дипломым сеҥен налын.
– Яра жапыште книгам лудаш йӧратем. Руш да марий произведений-шамычым ойырем. Утларакше йомак-влак келшат. Мыланем почеламутым тунемаш неле огыл. Кужу произве денийым пуат гын, кажне кечын изин-изин шарнен кодам, – ойла Ангелина.
Почеламутым сцене гыч моторын каласкалаш кугу вий, лӱддымылык да чытыш кӱлыт. Тыгай койыш-шоктышым вияҥдаш туныктышо-влак кугун полшат. Икой дене келшен ыштыме сомыл тек эре куаным конда.
Оля МАЙКОВА.
Авторын фотожо.
