Илен улмаш Изи Поч лӱман рывыж. Поро кумылан лийын гынат, чодыраште илыше янлык-влак тудын дене кутырен огытыл: шоячылан шотленыт. Икана мотор кеҥеж кечын шоныдымын-вучыдымын тале йӱр тӱҥале. Изи Почат йӱр деч шыле, пыжашыштыже шкет шинча.
– Поро кече, – шоктыш ала кӧн йӱкшӧ.
– Салам лийже, – лӱдмыжым сеҥен вашештыш Изи Поч.
– Мый дечем ит лӱд, мый тыланет осалым ом ыште.
– А мый тый дечет йӧршеш ом лӱд, – чоялана Изи Поч.
– Тыйын лӱдмет чытырымет гыч пале, – туран шокта йӱк.
– Тыште пычкемышыс, тый кузе ужат? – Изи Поч йӱкым паленак налнеже.
– А мый шижам.
– Тугеже кӧ улметым палдаре.
Изи Поч ончылно кугу упшым упшалше изи еҥ койылалтыш.
– Тый кӧ улат?
– Мый юзо поҥго улам, теве тыланет полшынем.
– Мыланем полыш огеш кӱл, – торешлана рывыж.
– Мый тыйын ойгетым палем, Изи Поч, – ойла юзо поҥго. – Тый вет чодырасе янлык-влак дене келшен илынет. Кугезет-шамыч гай ынет лий.
— Чыным ойлет. Мый сай да поро улам. Чыла дене келшен илынем.
– Тыге гына ойлымо шагал. Поро пашам ыштыман, неле годым полшыман. Кызытсе жапыште шомаклан шагалын ӱшанат. А тыйын родет-влак пеш чоя лийыныт. Тидым шкежат сайын палет, – радамла изи еҥ.
– Мыланна тыге пӱралтын, – манеш Изи Поч.
Юзо поҥго нимом ыш вашеште. Кузе пыжашыш толын, тугак йышт йомо.
Тале йӱр чарныш. Рывыж шке пыжашыж гыч лекташ тӱҥале. Кенета чодыраште полшаш йодын ӱжмым кольо. Лӱдмет-мочет, Изи Поч пикшла чымалте. Кугу вынемыште мераҥ кия.
– Лекташ полшо! – сӧрвала мераҥ.
– Вучалте, – мане Изи Поч да кудале.
Мераҥ янлыкын мутшылан ыш ӱшане. «Тудо чоя янлык», – шоналтыш семынже.
Икмыняр жап гыч Изи Поч кугу укшым шӱдырен тольо. Мераҥым вынем гыч утарыш. Шкеже моткоч йывыртен, вет тудат поро пашам ыштыш, чонланат сай. Вес кечын ты уверым чыла янлык пален нале. Тиддеч вара нуно Изи Поч дене келшаш тӱҥальыч: пырля модыт, унала коштыт. Ынде палат: неле-йӧсӧ годым Изи Почлан эҥерташ лиеш.
Полина АЛЕКСЕЕВА.
Морко, Коркатово.
