«Весёлый Муравейник» школ пеленысе лагерь эртыме годым ме, «Берендей» школ лесничествын чолга еҥже-влак, йоча-шамычлан профориентаций сынан пайремым эртаренна. И.Г.Порфирьеван вуйлатымыж почеш ныл станцийым ямдыленна. 1-4-ше класслаште тунемше 97 ӱдыр-рвезе чодыра паша дене кылдалтше профессий-влак нерген пален налаш шкешотан путешествийыш тарванен (снимкыште).
Тунемше-шамыч «Лесовод» станцийыште, нӧшмым да укшым ончен, пушеҥгын лӱмжым пален налыныт. «GIS-специалист» станцият оҥай лийын. Йоча-влак шке ныштым детективла шижыныт. Спутникысе снимке полшымо дене чодырам руымо верым, закон почеш огыл чоҥымо корным муыныт. Чодырасе илышым сандалык гычат эскерат улмаш! А «Инженер леса» станцийыште чодырасе пожарым йӧрташ тунемыныт. «Лесничий» станцият ойыртемалтше лийын. Куткышуэм шалатыме гын, кузе полшаш? Пушеҥге шӱмым кӱзӧ дене коркалыме гын, мом ышташ? Нине да моло йодышлан вашмутым муыныт.
Иктешлымеке, эн чолга ӱдыр-рвезе-шамычлан грамот ден пӧлекым кучыктенна. «Чодырасе профессий-влак» буклетым пӧлекленна. Пайрем мучаште ужар лышташ дене сӧрастарыме плакатым онченна. Кажне лышташыште тыге возымо: «Мыланем оҥай лийын, эше шуко пален налнем». Тугеже йоча-влаклан чодырасе профессий нерген палдарымына пайдале.
Полина ЩЕГОЛЕВА.
Марий Турек школ.
Фотом школ архив гыч налме.
