Пермь кундем Суксун оласе округыш пурышо Кызганде ял Марий Элын рӱдолаж деч индешшӱдӧ наре километр тораште верланен. Туге гынат тушто марий-влак илат. Тыглай гына огыл – чолга, калыкшын ончыкылыкшо верч тургыжланыше. Верысе школ пелен эсогыл «Изи памаш» йоча коллектив (снимкыште) уло. Тудым «Марий калык тӱвыра рӱдер» мер тӧнежын председательже, Пермь кундемын губернатор пелен калык-влак шотышто йодышла дене Координационный советын йыжыҥъеҥже, «Мер каҥаш» мер толкынын еҥже, тӱҥалтыш класслам 47 ий туныктышо Надежда Савватеевна Спиридонова кодшо курымын 90-ше ийла мучаштыже «Народоведение» кружок радамыште чумырен. Кызыт сулен налме канышыште гынат, чонжо школышко, йоча-влак дек, ӱжеш.
– Кружокышто икшыве-влак дене марла чын ойлаш тунемына, марий алфавит дене палыме лийына, марий калык дене кылдалтше тӱрлӧ проектым возена. Ик ужашыже – марий муро, кушташат кумылаҥдена. Йоча коллективым ик еҥ веле вияҥден ок керт. Полышкалыше-влаклан кугу таум ойлымо шуэш. Ача-ава-шамыч ик эн тӱҥ эҥертыш улыт. Тӱвыра пӧрт пашаеҥ Владимир Сергеевич Яшкин йоча-влаклан кугу тӱткышым ойырен, кушташ туныктен. 2021 ий гыч коллективыште Светлана Петровна Евдокимова баян дене шокта. Тудо профессионал, йоча-шамычлан кушкашышт кугу надырым пышта. Туныктышо Валентина Васильевна Прегаева моткоч усталык шӱлышан, илыш дене тӧр ошкылшо. Оҥай сценарийым ямдыла, вургемым, модым ончыктымаште моткоч полша. Школ вуйлатыше-влак кугу шӱкалтышым ыштат. Тӱрлӧ проектым возен, сеҥен налын, коллективым тӱрлӧ могырым вияҥдена, – ойла Надежда Савватеевна.
«Изи памашыш» тӱҥалтыш классла гыч 9-ше класс марте тунемше-влак коштыт. Йоча-шамыч школым тунем пытарат – коллективыш изирак ийготан-влак ушнат. Ик тукым весым алмашта. Марий йылмым сайын огыт пале гынат, муро гоч тудым тунемаш кумылышт уло. Мурын кажне шомакшым кусарен шарнен кодыт. Мураш мот коч йӧратат.
— Репертуарна кугу манаш ок лий. Тӱҥ шотышто, «Катюша», «Йывыртен пӧртылам», «Йӧратем…», «Кӱчык корным ом йӧрате, кужу корным йӧратем…» мурылам йоҥгалтарена. Тӱрлӧ мероприятийышке ушнена. Модым ончыктымаште ятыр гана сеҥыше лийынна. Йошкар-Олашке икмыняр гана мастарлыкнам ончыкташ миенна. Муро марий шӱлышан ӱдыр рвезе-влакым кушташ полша. А нунын кумылышт уло, тугеже лектыш лиеш, – ойла Надежда Савватеевна.
Христина АЛЕКСАНДРОВА.
Фотом коллективын архивше гыч налме.
