Т.Дмитриева лӱмеш «Тывырдык» марий куштымаш регион-влак кокласе фестиваль Йошкар-Олаште кокымшо гана эртаралтын. Тушко Марий Элысе тӱрлӧ район, Йошкар-Ола, Козьмодемьянск ола, Башкортостан, Чуваш республикла гыч 22 усталык коллектив ушнен. Нунын коклаште йоча ансамбль-влакым ужаш лийын. Тӱрлӧ ийготан артист-шамыч тӱрлӧ калык куштымашын шонымашыжым ончаш толшо ден жюрин еҥже-влаклан намиен шукташ тыршеныт. Йоча коллектив-влак коклаште Башкортостан Республик Стерлитамак оласе «Солнышко» ансамбль l степенян лауреат лӱм дене палесдалтын. Ты кундемынак Уфа оласе «Айтуган» куштышо калык ансамбль Гран-прим сеҥен налын.
