Амчемучашын изи артистше

Пошкырт кундемын уста шочшыжо Иван Петраев изинек музыклан шӱман. Тудын, шыргыжалын, гармоньым устан шокталтымыже да муралтымыже кажнын чоным савыра.

– Тукымышто чылан гаяк мураш, кушташ тале улыт. Ачамат, кочамат тӱрлӧ инструмент дене шоктеныт. Шкежат фольклор ансамбльыш коштынам. Икшыве-влакын 86 ияш Евдокия ковашт кызытат муралта,– ойла рвезын аваже Людмила Ильинична. Иван изиж годым ачажын шоктымыжым ончен, книгам кучен, гармонь семын шупшкедылын. Тыгай койышыжым ужын, ик ийым темымекыже, модыш гармоньым налын пуэнна. Варажым Игорь изам кум ияш йочалан ты семӱзгарымак пӧлеклен. Ачаж дене пырля эн ондак Калтаса семым шокташ тунемын.

Иван Петраев – ешыште кумшо икшыве.  Калтаса районысо Амчемучаш школышто 6-шо классыште тыршен тунемеш. Чолга йоча тальянке, аккордеон, баян да моло инструмент дене шокта. Тӱрлӧ фестивальыште участвоватла да сеҥымашыжат ятыр. «Уфимские жемчужины» конкурс-фестивальыште кокымшо степенян лауреат лӱмым шукерте огыл налын. Йошкар-Олаште «Изи гармоньчо» гала-концертыште поснак ойыртемалтын. Пошкырт кундемысе артист-влак дене пырля Москошто шошо каникул жапыште выступатлымыж годым тудлан гитарым пӧлекленыт. Иван тений Уфа, Екатеринбург олалаште илыше калыкым шке  мастарлыкше дене куандарен. Шукерте огыл Ставропольышто лийыныт. Тӱвыра аланыште тыгай уста самырык тукым палдырна гын, шочмо йӱла ден сымыктышнажат утыр веле вияҥыт.

З.ТИМОФЕЕВА.