Ожно ӱдырамаш-влак марий тувырым вынер гыч ургеныт да тӱрлӧ тамга дене сӧрастареныт. Кажне тӱр ойыртемалтше лийын. Утларакше кечым, тӱрлӧ кайык ден янлыкым, кушкылым келыштареныт. Тыгай сӱрет оҥышто, вачӱмбалне, урвалтыште лийын. Имне порылыкым, пиалым ончыктен. Йӱксӧ – тыныс илышым, ласкалыкым, йӧратымашым. Лыве – кужу ӱмырым, тошто марий улмым. Пӱчӧ – самырык тукымын вийжым, тумо – пеҥгыде тазалыкым. Поснак йошкар тӱсым кучылтыныт. Йошкар шӱртым тул ден кечын вийже семын палемденыт.
Поро сомыл
Марий тӱр – мондаш лийдыме поянлык. Морко район Унчо этнокультурный комплексын «Акреттӱр» студийже 2012 ий гыч пашам ышта. Тудо Шлань ялыште верланен. Коллективыште – вич еҥ. Пашаеҥ-влак тӱҥалтыште тӱр нерген книгалаште шымленыт, кова-шамыч деч йодыштыныт. Мероприятийлаште марий калык вургемын ойыртемже, ойпогыж нерген шинчымашыштым келгемеденыт. Чыла тидым шке пашашкышт шыҥдарен моштеныт. Опытым погымек, конкурслаш ушненыт, сатуштым ончерлаш луктыныт. Кызыт тиде студий кумдан чапланен.
– Марий тӱран тувырым, шовырым, шовычым да моло вургемым ямдылаш тӱрлӧ кундем гыч йодыт. Мемнан пашанам ончаш турист-шамыч чӱчкыдын толыт. Нунылан мастарлык-классымат эртарена, – ойла студийым вуйлатыше Марина Геннадиевна Гаврилова (снимкыште шола гыч кокымшо).
Калык дене пырля
«Акреттӱрын» коллективше марий калыкын йӱлажым, тӱвыражым, вургемжым арален кодымылан ятыр гана сеҥымаш дене палемдалтын. 2022 ийыште «Искусство вышивки» декоративно-прикладной творчествын республикысе фестивальыштыже икымше степенян диплом дене палемдалтын. 2023 ийыште регион-влак кокласе III этнофорумыштат ончыл радамыште лийын.
«Акреттӱр» студийын тӱрлызыжӧ-шамыч М.Г.Гаврилова, Г.Н.Архипова, Д.П.Анисимова, Н.Л.Оразаева, Р.А.Несмелова калыкын йодмыж почеш ургат, тӱрлат да шке пашаштышт эре ум шонен луктыт. Нунын ямдылыме мотор вургемышт дене тӱрлӧ йоча ансамбль пайдалана. Самырык тукымым тӱрлаш кумылаҥдаш манын, школышто кружокым ятыр ий вӱденыт. Тунемше-влак кызытат «Акреттӱр» студийыш кошташ йӧратат. Шочмо йӱлан поянлыкше нерген чылалан пален налаш пайдале. Марий тӱр – шочмо йылмын кышаже. Ме тудым мондышаш огынал.
З.ТИМОФЕЕВА.
Фотом студийын архивше гыч налме.
