Йошкар-Олаште Калык тӱвыра пӧртыштӧ «Ший талешке» конференций эртаралтын. Тушко тӱрлӧ районысо да оласе школла гыч туныктышо ден тунемше-влак пашаштым аклымашке луктыныт. Нуно «Кызытсе талешке мемнан коклаште», «Еш – мыйын эҥертышем» номинацийлаште таҥасеныт.
Самырык тукым тыныс илыш верч кредалше талешке-шамычым палышаш да шарнышаш. Ятыр шымлыме паша специальный военный операцийын лӱддымӧ сарзыже-влаклан пӧлеклалтше лийын. Йошкар-Олаште 14-ше номеран гимназийыште тунемше Тимур Фёдоров Россий спорт мастер Иван Денисов нерген «Илыш верч» пашам (туныктышыжо – Э.Н.Дмитриева) возен.
Данил Мамаев (Медведево, Руш Кукмарий) шочмо кундемысе геройжо-шамыч нерген «СВО-н лӱддымӧ талешкыже-влак» материалым (туныктышыжо С.В.Белова) ямдылен.
Морко район Унчо школышто тунемше Андрей Иванов «Афганистан мыйым пеҥгыдемден» темым (туныктышыжо – Р.Н.Петрова) авалтен.
Еш – ик тӱҥ поянлык. Йоча-шамыч кочаштын, коваштын илыш корныштым палат. Ача-аваштын мастарлыкышт дене кугешнат. Теве Советский район Ӱшнӱр школышто тунемше Артемий Моисеев «Мыйын ешем – мыйын пиалем» келге шонымашан пашам (туныктышыжо – З.А.Волкова) аклымашке луктын.
Кажне участник тыршен да тӱрлӧ темым авалтен. Жюри 1-ше вер дене Мария Петуховам (Калыкле сымыктыш гимназий), Виктория Красновам (Морко, Эҥерсола), Ульяна Афанасьева ден Анна Васильевам (Волжский, Памар) палемден. Нуным снимкыште ужыда.
Тыгай конференций патриотизм шӱлышым вияҥда, Шочмо элым йӧраташ, лӱддымӧ лияш тарата.
З.ТИМОФЕЕВА.
