Тений мыланем «Артек» тӱнямбал йоча рӱдерын «Наследники Великой Победы» визымше сменыштыже канаш пиал шыргыжалын. Шеледыме почеш «Лесной» йоча лагерьышке логалынам. Кажне кече тӱрлӧ мероприятийлан поян лийын: экскурсийыш, ончерыш коштынна, модынна, муренна, куштенна, таҥасымашлаште вийнам тергенна. 9 майыште «Курымашлык полк» акцийышке ушненна. Комбинированный турист маршрутышто 2-шо верым сеҥен налынам. Эше школыш коштынна. Тудо могай мотор! Хогвартс школым ушештара.
Пӱртӱсшат чоным вӱчкен: Шем теҥыз, Аю-Даг курык, Адалары отро… Аю-Даг «Маска курык» манме лиеш. Уке, тушто янлык-влак огыт иле. Тудо маскан капшым ушештара. 8 майыште тиде курыкышко кӱзенна. Кӱкшытшӧ – 570 метр утла. Лач тушто мемнам артековец радамышке пуртеныт. Тиде кугу пиал да чап. Йоча-влак, тыландат «Артекыш» миен толаш тыланем.
Ксения ХАРИТОНОВА.
Параньга, Усола.
