«Артек» тӱнямбал йоча рӱдер ик эн мотор, кумылым нӧлтышӧ верлан шотлалтеш. Тушто кызыт мыят канем. Лагерьыш логалаш авам полшен. Ме пытартыш кум ий жапысе диплом ден грамотем-влакым артек.дети сайтеш вераҥденна. Мый шочмо кундемын экологийже дене кылдалтше проектлашке, тӱрлӧ олимпиадышке, сӱрет конкурслашке, спорт таҥасымашлашке чӱчкыдын ушнем, садлан сеҥымашем ятыр. Чылаже 344,46 баллым погенам. Индешымше сменыш логалмем нерген июньышто сай увер толын. Марий Эл Республик гыч коло ӱдыр-рвезе логалынна. «Морской» лагерьыш миен шумеке, мыланна мотор формым кучыктеныт. Отрядлашке шеледымеке, мыйым «Футбольныйыш» колтеныт. Снимкыште мый ӱлыл радамыште пурла гыч пытартыш улам. Тыгак ме келшыше студийым ойыренна. Кызыт «Астрономийыш» коштам. Канаш жап йӧршын уке. Эре у пашалан тунемына, оҥай еҥ-влак дене палыме лийына.
Йоча-шамыч, тыландат «Артекыш» миен толаш темлем. Чолгалыкдам тӱрлӧ вере ончыкташ веле ида ӧркане.
Давид ТИМОФЕЕВ.
Волжск, 2-шо номеран школ.
